9844698505
Follow Us On :

आखिर स्टार चै को हो ?

स्टार को ? नेपाली चलचित्र क्षेत्रमा यतिबेला यो प्रश्नको जवाफ दिन सक्ने सायदै कोही होलान् । हाम्रो चलचित्र क्षेत्रमा सीमित चलचित्रकर्मी छन् । तीमध्ये पनि ‘स्टार’ को भन्ने विषयमा सबैको एकमत छैन ।केही चलचित्रकर्मी धेरै पारिश्रमिक लिने अर्थात महँगा कलाकारलाई स्टार मान्दछन् भने केही सबैभन्दा व्यस्त कलाकार स्टार हुन् भन्छन् ।

क किसिमका चलचित्रर्मी जसको चलचित्रले राम्रो व्यवसाय गर्छ, राम्रो दर्शक पाउन सफल छ । त्यसलाई स्टार भनिनुपर्ने तर्क अगाडि सार्दै आएका छन् ।

हुन त अवार्ड र सम्मान पाउने मात्र स्टार हुन् भन्ने मान्यतामा केही चलचित्रकर्मी पनि छन् । यस हिसाबले हेर्ने हो भने स्टार यही हो र यसले निर्धाण गर्छ भनेर सजिलै भन्न वा नाम लिनसक्ने अवस्था अहिले चलचित्र क्षेत्रमा देखिन्न र छैन ।

महँगा स्टार !

samragyee rl shah hd को छविको परिणाम

पछिल्लो समय अनमोल केसी, प्रदीप खड्का, साम्राज्ञी राज्यलक्ष्मी शाह, पूजा शर्मालगायत केही कलाकार पारिश्रमिकका हिसाबले सबैभन्दा महँगा कलाकारको रूपमा अगाडि देखिएका छन् । उनीहरुले लिने पारिश्रमिक अहिले चलचित्र क्षेत्रमा सबैभन्दा बढी भएको चर्चा हुने गर्दछ ।

पारिश्रमिकको सच्चाइ र वास्तिविकता न त बाहिर आउँछ न त त्यसको रेकर्ड नै कहीँ कतै भेट्टाइन्छ । तर उनीहरुको भनाइ र मिडियामा छाएको समाचारका आधारमा यी कलाकार यति बेलाका स्टार हुन् भन्ने जमात पनि ठूलै छ ।

फिल्म निर्माण, वितरण र प्रदर्शकका रूपमा करिब दुई दशक बिताएका सुनिल मानन्धर पैसा धेरै लिनेलाई स्टार भन्न नमिल्ने बताउँछन् ।

‘पैसा धेरै लिदैमा स्टार भन्न मिन्दैन । उसले खेलेको चलचित्रको लगानी कति सुरक्षित भएको छ । त्यो सबैभन्दा महत्त्वपूर्ण कुरा हो’, सुनिलले भने ‘म फिल्म खेल्दिनँ । मलाई कसैले लिँदैनन् । म मेरो पारिश्रमिक ६० लाख घोषणा गर्छु । के म स्टार भए त ?’

 

bipin karki  hd को छविको परिणाम

आफूलाई महँगो कलाकारको रूपमा देखाउन आफ्नो पारिश्रमिक आफैले धेरै घोषणा गर्दैमा कोही स्टार नहुने सुनिलले तर्क राखे ।

सुनिलको कुरामा वरिष्ठ निर्देशक दयाराम दाहाल पनि सहमती जनाउँछन् । पारिश्रमिक बढी दिनेले दियो, लिनेले लियो । त्यसभित्र स्टारडमको कही केही कुरो नभएको दाहाल बताउछन् ।

‘स्टार त्यो हो जसको छाप आम दर्शकको मनमा छ’, थुप्रै हिट फिल्म दिएका दहालले भने ।

पछिल्लो समय हिट फिल्म दिँदै आएका निर्देशक नवल नेपालको विचार पनि सुनिल र दयारामको भन्दा भिन्न छैन । धेरै पैसा लिनेलाई स्टार भन्न नमिल्ने बताएका नेपालले भने, ‘त्यो कलाकार बाहिर निस्किँदा भीड देखिँदै र कसैले चिन्दैनन् भने त्यसले करोड पारिश्रमिक लिए पनि त्यो स्टार बन्न सक्दैन ।’

निर्देशक मदन घिमिरे पनि स्टारडमसँग पैसाको तुलना गर्न नमिल्ने बताउँछन् । ‘अहिले धेरै पैसा लिनेलाई स्टार मान्छन् केही चलचित्रकर्मी । ती स्टार होइनन्’, घिमिरेले भने, ‘राजेश हमाल, भुवन केसी, करिष्मा मानन्धरलगायतका पुराना कलाकारको चलचित्र हिजो १०० दिन पनि मनाउँथ्यो । उनीहरु पारिश्रमिको मामलामा कहिल्यै चर्चामा आएनन् । के उनीहरु स्टार थिएनन् त ?’

‘धेरै पैसा माग्ने । मेरो बुबा निर्माता हुनुपर्छ भन्ने । परिश्रमिक लिएर पनि मेरो यति सेयर हुनुपर्छ भनेर सर्त राख्ने केही कलाकार पनि रहेछन्,’ घिमिरेले थपे ‘ती व्यक्तिलाई स्टार कसरी भन्ने । ती खेल्दैमा फिल्म चल्छ भन्ने ग्यारेन्टी पनि त छैन नि ।’

समीक्षक तथा फिल्म निर्देशक दीपेन्द्र लामा पनि धेरै पारिश्रमिक लिनेलाई स्टार भन्न नमिल्ने तर्क राख्दछन् । उनी भन्छन् ‘ती उल्का पिन्ड हुन् । अहिले पारिश्रमिकले चर्चामा छन् । केही समयपछि आफै हराउँछन् ।

व्यस्त सजिला

nischal basnet hd को छविको परिणाम

हुन त नेपाली चलचित्र क्षेत्रमा पारिश्रमिकका हिसाबले कहिल्यै चर्चामा नआएका केही यस्ता कलाकार पनि छन् । जसको व्यस्तता सबैभन्दा धेरै छ । ती कलाकारलाई लिएर फिल्म बनाउन मागेको रकम तिर्छु भन्दा पनि डेटको समस्याले निर्माता निर्देशक चुप बस्न बाध्य छन् । वर्षौंसम्म कुर्छन् ।

तैपनि समय पाउन सकेका छैनन् । ती कलाकारमा दयाहाङ राई, सौगात मल्ल, विपिन कार्की लगायत केही पर्दछन् ।

अर्काे एकथरि यस्ता कलाकार पनि छन्, जसलाई आफ्नो फिल्म के रिलिज भयो । के आउँदैछ भनेर पनि थाहा हुँदैन । उनीहरू फिल्म अभिनयमा निकै ब्यस्तछन् । ती कलाकारमा अनुप बराल, बुद्धि तामाङ, अनुमविक्रम शाही, वर्षा सिवाकोटी लगायत पर्दछन् ।

केही चलचित्रकर्मी यी कलाकारलाई अहिलेका स्टारको रूपमा चर्चा गर्ने गर्छन् ।

धेरै फिल्म खेल्दैमा स्टार भन्न नमिल्ने निर्देशक घिमिरे बताउँछन् । ‘जो सजिलो, सहज छ, जसले समय मिलाउन सक्छ । त्यसले बढी फिल्म खेल्छ’ घिमिरेले भने ‘धेरै फिल्म खेल्दैमा स्टार हँुदैन । त्यस्तालाई व्यस्त कलाकार भन्न सकिन्छ ।’

निर्देशक घिमिरेको विचारसँग निर्माता वितरक सुनिलको विचार पनि मिल्छ । उनी पनि धेरै फिल्म खेल्नेलाई व्यस्त कलाकार भन्नुपर्ने बताउँछन् । ‘जसको फिल्म शुक्रबार चलेर आइतबार उत्त्रन्छ । त्यो कसरी स्टार भयो ?’ सुनिलले प्रश्न उब्जाए ।

फिल्म चल्ने स्टार होइनन्

saugat malla hd को छविको परिणाम

केही वर्षयता ‘छक्का पन्जा’ टिमका सबै फिल्म हिट भएका छन् । एक हिसाबले हेर्दा जसले लगातार हिट फिल्म दिन्छ । त्यसलाई स्टार भनिनु पर्छ । यो हिसाबले हेर्ने भने ‘छक्का पन्जा’ टिमका दीपकराज गिरी, जीतु नेपाल, केदार घिमिरेलगायत सबै कलाकारलाई स्टार भनिनुपर्छ । तर यो टिमका कलाकारलाई स्टार भनेर भन्न नमिल्ने बताउँछन् निर्माता तथा वितरक गोपाल कायस्था । ‘दीपकराज गिरी टिमको फिल्मले त पैसा कमाउँछ । कमाइ रहेको छ,’ कायस्थाले भने ‘फिल्मले पैसा कमायो भन्दैमा उनलाई स्टार भन्न सकिन्न ।’

पछिल्लो समय दीपकराज गिरीको ‘छ माया छपक्कै’ मात्र होइन अन्य विपिन कार्कीको ‘जात्रै जात्रा’ र दयाहाङ राईको ‘कबड्डी कबड्डी कबड्डी’,  विपिन कार्कीकै ‘प्रसाद’ लगायत फिल्मले पनि बजारमा तताएको छ ।

केही दिन पनि दर्शक मुस्किलले पाउने गरेको समयमा यी फिल्मले नाफा कमाउनु चानचुने कुरो होइन । त्यसैले जुन फिल्मले निर्माता जोगाउँछ । त्यो फिल्म हिट र त्यसका कलाकार स्टार भन्ने चलन पनि छ ।

निर्माता वितरक सुनिल मानन्धरको भनाइ पनि यही रहेको छ । ‘जसले हिट फिल्म दिन्छ, जसको फिल्मबाट निर्माता निर्देशक सुरक्षित हुन्छन्, त्यही फिल्मका कलाकार स्टार हुन्’ सुनिल भन्छन् ।

सुनिलको कुरामा वरिष्ठ निर्देशक दयाराम दाहालको पनि सहमती छ । दाहालले भने, ‘जसको चलचित्रले निर्माता सुरक्षित गर्छ । चलचित्र उद्योगलाई चलायमान गराउन सक्छ । त्यो पनि स्टार हो ।’ आम मानिसको समस्यामा जसले बोल्ने र उठाउँछ । त्यसलाई पनि स्टार भन्न मिल्ने दाहालको भनाइ रहेको छ ।

जुन चलचित्रले हलमा दर्शक तान्न सक्छ । त्यसका कलाकारलाई केही हदसम्म स्टार भन्न मिल्ने निर्देशक मदन घिमिरे बताउँछन् । उनी भन्छन्, ‘तर त्यो अवस्थामा त्यसलाई स्टार बनाउन पर्दा पछाडि रहेर काम गर्नेलाई बिर्सनु हुँदैन । किनभने स्टार बनाउने पनि स्टार हुन्छ ।’

नेपाली चलचित्र क्षेत्रमा हिट फिल्म दिँदै आएका निर्देशक नवल नेपाल भने माथिको विचारसँग पटक्कै सहमत छैनन् । उनी फिल्म हिट हँुदैमा स्टारको पदबी दिन नमिल्ने बताउँछन् ।

दर्शकले चिन्ने स्टार

aanchal sharma hd को छविको परिणाम

पारिश्रमिक, चलचित्रको सङ्ख्या, चलचित्र हिट वा फूलप जे भए पनि त्यसको आधारले स्टार निर्धारण नगर्ने थुप्रै चलचित्रकर्मीको धारणा रहेको पाइन्छ । जुन कलाकारको सर्वसाधारण माझ क्रेज छ । जुन कलाकारलाई दर्शकले सजिलै चिन्छन् । सार्वजनिक स्थानमा उभिँदा उनीहरू सर्वसाधारणको भिडबाट घेरिन्छन् । ती कलाकार स्टार भएको धारणा राख्ने पनि कम छैनन् चलचित्र क्षेत्रमा ।

कतिपय चलचित्रर्की त अझै राजेश हमाल, विराज भट्ट, निखिल उप्रेती, करिस्मा मान्नधर, शिव श्रेष्ठ जस्ता कलाकार नै स्टार भएको बताउछन् ।

तीमध्येका एक पुराना निर्देशक दयाराम दाहाल पनि हुन् । जसको अनुहारले हेर्न दर्शक हल वा बाहिर भीड हुन्छन् । उसको अनुहार भएकै भरमा फिल्म चल्छ  । त्यसलाई मात्र स्टार भन्न मिल्ने निर्देशक दाहालले बताए ।

दाहालको जस्तै विचार निर्देशक मदन घिमिरेको पनि छ । घिमिरे भन्छन्, ‘ जुन कलाकारको कारणले हलमा टिकट काटिन्छ ऊ स्टार हो ।’

निर्माता गोपाल कायस्थाको धारणा पनि यी दुई निर्देशकसँग मिल्दोजुल्दो छ । फिल्म चल्नु, नचल्नु आफ्नो ठाउँमा छ तर जो सार्वजनिक ठाउँमा उभिँदा भीड जम्मा हुन्छ । उनीहरुको एक झलक हेर्न सर्वसाधारण तँछाडमछाड गर्दछन् । ती व्यक्तिलाई स्टार भन्न मिल्ने गोपालले बताए ।

नेपाली चलचित्र क्षेत्रमा राजेश हमाल, भुवन केसी, शिव श्रेष्ठ, निखिल उप्रेती, विराज भट्ट र करिष्मा मानन्धर लगायत अघिल्लोे पुस्ताका कलाकारको जस्तो पछिल्लो पुस्तामा क्रेज भएका कलाकार अझै नदेखिएकोले यी कलाकारलाई नै स्टार भन्नुपर्ने तर्क गोपालले राखे ।

गोपालको विचारसँग मिल्दो जुल्दो धारणा निर्देशक नवल नेपालको पनि छ । अहिले पनि राजेश हमाल, भुवन केसी, शिव श्रेष्ठ, करिष्मा माननधर लगायतका कलाकार नै सिने स्टार भएको उनी बताउँछन् । भन्छन्, ‘जसको तस्बिर पब्लिकले कपीमा, घरको भित्तामा, पर्समा राख्छन् त्यो स्टार हो ।’

अवार्ड पाउने के

preyanka karki hd को छविको परिणाम

चलचित्र विधा समेटेर पछिल्लो समय चलचित्र क्षेत्रमा दर्जन बढी अवार्ड आयोजना हुन थालेका छन् । अवार्डका आधारमा कतिपयले उत्कृष्ट कलाकार र स्टार कलाकारको निर्धारण समेत गर्दछन् ।

जो काम, दर्शकमा भएको क्रेज र सफल फिल्मको आधारमा अवार्ड हात पर्छ ऊ स्टार हो भनेर लबिङ गर्ने एक किसिममा मानिस पनि छन् ।

 

पछिल्लो समय अवार्ड आयोजक अवार्डको गरिमा जोगाउन नसकेको कारण अवार्ड थापेको आधारमा त्यो कलाकारलाई स्टार भन्न नमिल्ने पत्रकार तथा निर्देशक लक्ष्मण सुवेदी बताउँछन् । ‘अहिले जो पनि अवार्ड आयोजक, जसले पनि अवार्ड पाएका छन्,’ सुवेदीले भने ‘अहिलेको अवार्डको गरिमा र महत्त्व नै छैन । त्यसैले यसको आधारमा स्टार निर्धारण गर्न सकिन्न ’।

सुवेदीको विचारसँग ‘जात्रा’, ‘जात्रै जात्रा’लगायत केही फिल्म हिट दिएका निर्देशक भट्टराई पनि सहमती जनाउँछन् छन् । उनी नेपालको परिपेक्ष्यमा स्टारसँग अवार्डको टाढा टाढासम्म पनि सम्बन्ध नरहेको बताउँछन् ।

कन्टेन हो स्टार

dayahang rai  hd को छविको परिणाम

चलचित्र क्षेत्रमा सीमित मानिस यस्ता पनि छन् जो कलाकारभन्दा पनि त्यसको कन्टेन्टलाई स्टार मान्छन् । कन्टेट बलियो भयो भने दर्शक पनि हलमा आउँछन् । कलाकार पनि हिट हुन्छन् र निर्माताले पनि नाफा कमाउँछ भन्ने उनीहरुको धारणा छ ।

ती मध्यमा पर्दछन् निर्देशकद्वय दीपेन्द्र लामा र प्रदीप भट्टराई ।

‘नेपालमा कलाकारभन्दा पनि कन्टेन्ट चल्ने हो । त्यो हिसाबले स्टार कन्टेन्ट नै हो’, दीपेन्द्रले भने ‘एक दुई दिन दर्शक हलमा होल्ड गर्नेलाई स्टार भन्न सकिन्न र मिल्दैन ।’

दर्शक हलसम्म कलाकारले भन्दा पनि कन्टेन्टले तान्ने बताउने दीपेन्द्रले राम्रो चलचित्र दिने, दर्शकमा आफ्नो चरित्रको छाप छोड््न सक्ने व्यक्तिलाई स्टार भनिनुपर्ने धारणा अगाडि सारे ।

दीपेन्द्रको धारणासँग निर्देशक प्रदीप भट्टराईको विचार पनि मिल्दोजुल्दो छ ।

‘राम्रो चलचित्र पनि खेल्नु पर्‍यो, त्यो चलचित्र दर्शकले रुचाउन पनि पर्‍यो, निर्माता सुरक्षित पनि हुनुपर्‍यो’ प्रदीपले अगाडि भने ‘चलचित्र चलेपछि स्टार हुनुपर्ने हो । हाम्रो चलचित्र क्षेत्रमा चलचित्र नचलेकालाई पनि स्टार भनिरहेका छन् ।’

चलचित्रले स्टार बनाउने धारणाका प्रदीपले थपे ‘अरूले नमानेको स्टार भएर हो कि नेपालमा स्टार निर्धारण गर्ने आधार केही फरक रहेको छ ।’

दर्शकमा क्रेज, हिट फिल्म, कन्टेन्ट राम्रो लगायतको प्याकेज नै स्टार भएको प्रदीपको भनाइ रहेको छ ।